شاي رأس الحصان

الشاي بالنسبة لنا كمصريين مش بس مشروب رئيسي … دا حاجة كدا اتعودنا عليها من زمن الزمن. رمزية الشاي مش بس في كون انه مشروب - لأ أبسولوتلي حضرتك. في شركات ضخمة أنشئت وثارات صعيدية من الصعيد الجواني اتحلت ومشاكل بين أصحاب كان لا يمكن يكلموا بعض اتلمت على كوباية الشاي دي.

في دول كتير اعتمدت الشاي كمشروب رئيسي زي سريلانكا, مصر وانجلترا وغيرها كتير. وطبعا لاختلاف جغرافية الأرض فطعم الشاي بيتغير على حسب البلد المزروعة فيه.

مش كدا وبس - في البلد الواحد حتى بتلاقي تغير في طعم الشاي - فمثلا عندنا في مصر تلاقي شاي البدو وعرب مطروح والصحراء الغربية غير شاي وجه بحري غير شاي الصعايدة.

يعني مثلا أفتكر اني في فترة من فترات حياتي كنت شغال في الصحراء الغربية في البترول وكان دايما بيبقي في خيم للعرب والبدو حوالين بريمة الحفر. فكان عندي فضول اروح اشوف قعدتهم والروقان اللي هما فيه دا وازاي بيقدروا يحطوا كل حاجة على جنب ويتجمعوا حوالين زردة شاي معتقدش أنك هتدوق أجمل منها في حياتك.

مرت الأيام وسافرنا السعودية هنا ولازال بردو كوباية الشاي بالنعناع هي المشروب الرسمي اللي لو فات يوم كدا من غير ما تشربه تحس ان في حاجة غلط. في شىء مش تمام. انت لازم تقوم تعمل لك كوباية شاي قبل ماتكمل قراءة.

اللي قدامنا في الصورة هنا دا اسمه شاي رأس الحصان - شاي ورق معد لانك تغليه في البراد - شاي سيلاني محترم وبصراحة طعمه ممتاز. لو انت في السعودية أنصحك تجربه.

الطريقة الصحيحة لعمل الشاي انك تشتري شاي ورق وتحطه مع ماية وتغلي - تحط السكر حسب الطلب والنعناع طبعا ولاننسى المدرسة اللي بتحب تشرب الشاي بلبن.

الإنجليز بيحبوا يشربوا الشاي بلبن - هي دي الطريقة اللي بيشربوا بيها.

لو مش هتقدر تغلي الشاي الورق ومفيش قدامك غير الشاي فتلة فانت كدا مقدامكش غير شاي أحمد Ahmed Tea وطبعا دا براند قوي ومعروف وعاملين ييجي 100 نوع شاي بجميع الأطعمة اللي ممكن تتخيلها.

بصراحة انا جربت Ahmed Tea - بيغطي على كل الانواع التانية وطعمه قوي كدا وهيخليك مصحصح ومركز وهتحس انك شربت كوباية شاى مش مجرد تحلية بعد الأكل.

انا اعرف حد شغال معانا في الشركة مش بيدخل يسلم علينا غير لما يبقى عامل كوباية الشاي وجايبها في ايده - ساعتها نقدر نعمل Hand Over للشيفت ونروح.

دمتم شاربين للشاي ودام ذلك الكوب الساحر مزاجا حلالا طيبا للعامة والدهماء والأثرياء على حد سواء.

ورينا شايك بيقول ايه