كيفية ربط حسابك فى بايبال ببنك محلى مصرى

الدليل الشامل لربط حسابك فى بايبال ببنك محلى.

المقالة دى لربط بنك محلى مصرى - خصوصا لو فى محافظة الاسكندرية. بناء على توصيات أكبر عدد من ال freelancers المصريين أفضل ربط مباشر بين بايبال وبنك اسكندرية.

بتروح بنك اسكندرية اى فرع، أفضل فرع فيهم فرع سبورتنج لان فى موظفين اساسا شغالين freelancers , اللى عملت معاه بطاقتى كان شغال social media marketer وفاهم الموضوع بشكل محترم.

أسوأ فرع فيهم فرع محطة الرمل … الناس عايشة فى كهف هناك !

لو سنك من ١٦ لغاية ٢١ سنة بتحتاج وصى معاك وبتاخد بطاقتك, أما لو سنك من ٢٢ سنة لغاية ٢٦ سنة بتروح من غير وصى وبتقدم على فيزا الشباب = فيزا يوث = فيزا حساب توفير الشباب = debit card

فى فرع سبورتنج العملية smooth جدا وبتدفع ٣٠٠ جنيه فتح حساب = حد أدنى لفتح الحساب، هناك الموظف هيديك باسورد عشان تربط حسابك بابليكيشن Alex bank + هيعملك ربط بابليكيشن محفظتى عشان تدفع اى فاتورة وتشترك فى فورى والليلة دى.

فى خلال أسبوع بيتصل بيك المندوب اللى هيوصلك بطاقتك وهتستلمها شخصيا بالبطاقة بتاعتك … هتتصل برقم ١٩٠٦٦ وتكلم خدمة العملاء تفعل البطاقة وبعدين هتروح تحطها فى ATM Alex bank عشان تقدر تشغلها ومبروك عليك.

مصاريف ربط البطاقة ببايبال وازالة ال limit وعمل confirmation تقريبا خمسين جنيه = 1$ + 1.5€ وهيبعتولك على ال gmail بتاعك سبعين رسالة تأكيد 😎 وكذلك على موبايلك SMS … مبروك عليك تقدر تسحب فلوسك بأمان

FAQs

• محمد طيب انا حسابى بالدولار ولا بالجنيه؟ حسابك فى بايبال بالدولار او اليورو وبستقبل على حسابك فى بنك اسكندرية بالجنيه المصرى - معرفش ممكن تستقبل دولار ولا لأ عشان انا حسابى فى بنك اسكندرية بالجنيه 😎 -.

• محمد طيب انا سنى اكبر من ٢٦ سنة اعمل ايه؟ فيزا انسباير والحد الادنى فيها ١٠٠٠ جنيه لفتح الحساب

• محمد انا مش عارف اربط البطاقة ببايبال؟ هتدخل بيانات بطاقتك فى خانة البطاقة مش الحساب البنكى لما تفتح صفحتك على بايبال وتكتب رقم بطاقتك واخر ٣ ارقام فى البطاقة من ورا وتاريخ انتهائها ونوعها - فيزا طبعا -.

• محمد انا معايا بطاقة master card تنفع ولا لأ؟ لأ متنفعش لان بايبال بيقبل فى مصر visa

• محمد انا رحت والموظفة دخلتنى فى حوار بطاقة ائتمانية وحد ادنى ٣٠٠٠ جنيه كلام عجيب كدا اعمل ايه؟ كل اللى بايبال محتاجه بطاقة فيزا شباب او انسباير او اى حساب جارى او توفير بس يكون نوعها فيزا … لو معاك بطاقة ائتمانية مفيش مشكلة ربنا يوسع عليك لكن فيزا.

ملحوظة

اى سحب بيخصم خمسه دولار على تحويل فلوسك من بايبال للبنك المحلى، لو استنيت لاول الشهر بيتم تحويل الفلوس تلقائيا بدون خصم الخمسة دولار.

التحويلات بتحصل instantly سواء حد بيحول لك على بايبال او التحويل للبنك المحلى، الخدمة دى رائعة غير فيزا البريد اللى بتاخد يومين😑.

أى حد عنده استفسار يسأل وهرد على استفساراتكم ياجماعة، احنا كلنا اخوات وبنساعد بعض