انا فود بلوجر لمدة يوم

في السعودية هنا وخصوصاً في المنطقة الشمالية، مفيش وسائل ترفيه كتير. اخرك تروح الحديقة تفيح أولادك لو متجوز ولو واحدة ست تروح محلات مستلزمات المنازل أو ماركيتات الخمس ريالات.

لحسن الحظ -أو لسوء الحظ مش عارف- أن الوضع مختلف معانا كشباب. لأن أغلبنا بيبقى عايز ياكل أكلة حلوة ويروق على حاله. يقابل صديق ماشفهوش من زمان. يروح سينما - أشياء من هذا القبيل.

انا بصراحة بقولها بكل شفافية - أنا بعز الأكلة الحلوة. اللي معمولة بحب واللي تخلي مستويات الدوبامين تعلى عندك كدا لما تخلص أكل.

عايز تعرف انا بتكلم عن ايه؟ اتفرج على واحدة من فلوجات مارك وينز وشوف ازاي بيميل براسه لما يدوق حاجة فعلا تكيفه وتبسطه.

اللي حاصل اني قريب من منطقة عرعر في شمال السعودية - منطقة سعودية بدوية عريقة. اتعزمت فيها على عشاء وبصراحة الاكل كان تحفة وكان لازم اكرر التجربة دي. انا بشوف الاكل تجربة. استقبال متر الصالة ليك وانت داخل المطعم, ابتسامة الستاف اللي موجود في المكان, الـ Vibes بتاعة المكان والديكورات وروح المكان - تقييم المكان من زواره على منصات التواصل الاجتماعي, جودة الأكل والأهم نظافة المكان والشيفات.

بصراحة قليل انك تلاقي مطعم فيه كل المميزات دي لكن دا اللي انا لقيته في مطعم الشيف البغدادي. اول لما بتدخل بيقدمولك Appetizer أو تصبيره كده لغاية لما الاكل بتاعك يجهز. جودة ونظافة واحترام وسعر كويس. اه, انا مش بحب اصور الاكل - فغالبا مش هتلاقيني بعرض صور أكل أكلته في أي مكان.

دا شكل المطعم من برا

ودا المكان من جوا - طبعا مش عايز انسى الشاي العراقي الجميل اللي بيقدمهولك بعد الاكل - حاجة كدة خيال. بعترف ان دا أحسن شاي انا شربته في حياتي.

على النقيض من كدا. بستغرب جدا من المطاعم اللي بتقدم أي أكل وخلاص - انت مش بس بتخسر زبون, انت بتبوظ صناعة كاملة وبتشيل فكرة ان حد ينزل ياكل برا بيته. بطريقتك دي انت خسران جدا - متستعملش بروتينات مجمدة سواء دجاج او سمك او لحم. متحملش الستاف بتاعك فوق طاقته, متخليش اكل يبات عندك, باختصار … في ألف طريقة عشان تخسر الزبون. أرجوك ابتعد عنهم.

نقطة كمان. طعم الاكل الفلاحي بتاع زمان دا شىء نادر -أصيل ومعمول بحب.