عن السما والسدم والأفلاك

من زمان وانا بحب السما - كان وانا عندي 6 سنين كده بيبهرني منظر الطيارات و بستغرب ازاي بتقدر تطير في السما ومتقعش. ازاي بتشوف في الليل العتمة وبتوصل لمكانها - وايه كم النجوم دي كلها؟ لوحة السما لوحة بديعة خلقها رب كريم مبدع.

وكلما ازددت علم ازداد فهمك للظواهر من حواليك. فبتكبر وتعرف اننا مش لوحدنا في الكون الفسيح دا. دا في كواكب تانية بتدور حوالين الشمس. وفي نجوم تانية أكبر من الشمس بكتير وفي سدم وسحب نجمية ومجرات وعناقيد وكون بيتمدد كل يوم. ربنا بيقول: “والسماء بنيناها بأيد وإنا لموسعون” في اشارة الى ان الكون بيتمدد بصفة مستمرة.

ساقني القدر الى اني اشتغل في مجال البترول في فترة من فترات حياتي. هنا كان لابد اعمل Activate لواحدة من هواياتي القديمة >>> ألا وهي الـ Stargazing أو تتبع النجوم وتحديد الاتجاهات وكدا.

احنا كنا بنشتغل في الصحراء الغربية بحثا عن الذهب الاسود _ وبحكم شغلي في العيادة كان بيبقى عندي وقت فراغ أحيانا. فكنت بحب اصور السما. بس عمري ما عرفت اصور ذراع المجرة. وطبعا مع موبايل شاومي متوسط الجودة كان دا بيشكل تحدي كبير.

حطيت في دماغي اني لازم اصور ذراع المجرة - ماهو احنا مش اقل من هواة الفلك اللي مصدعين دماغنا كل شوية بصورهم في وادي الحيتان مع خلفية ذراع المجرة والأندروميدا وسديم Orion

دي كانت احد محاولاتي

وهنا قدرت أصور القمر بس طبعا بموبايل أحدث شوية Samsung s24 ultra بيطلع صور ممتازة بفضل خاصية الزوم اللي فيه

للي ميعرفش - دكتور شادي عبد الحافظ هو طبيب صيدلي واحد هواة الفلك المشهورين في مصر ويعتبر مؤسس جروب نادي هواة الفلك في الدلتا وده جروب بيضم جميع هواة الفلك والمهتمين بالعلم دا. ليه كتاب جميل جدا قرأته اسمه : كتاب السما ودا يعتبر بداية كويسة لأى حد حابب ياخد فكرة عن الفلك بشكل عام وكيفية شراء أول تلسكوب ليك وازاي تشوف مجموعة مسييه المشهورة Messier وتطلعهم بنفسك باستخدام تلسكوب او منظار معظم.

طبعا ناسا الله يبارك لهم أفادوا البشرية في مجال الفلك بشكل كبير باختراعهم لتلسكوب هابل واللي قدر يصور اكتر من 4 الاف صورة فلكية أفادت البشرية في فهمهم للسما ودراسة الظواهر الفلكية شديدة التعقيد وهنا منقدرش ننسى واحدة من أشهر الصور الفلكية على الإطلاق Deep field

احا كعرب كان لينا السبق في علوم الفلك - علماء زي البيروني والطوسي وثابت ابن قرة كان ليهم السبق في علم الفلك ومحاولات اولية في تحديد عمر الكون واختراع الأسطرلاب وغيره. يارب نرجع زي زمان متقدمين في علوم الدنيا اللي مش بس بتفيدنا في حياتنا اليومية, دي كمان بتقربنا من ربنا وبتخلينا على يقين ان خالق هذا الكون العظيم هو أكبر من حدود تصور عقلنا البشري الصغير واننا ذرة في بحر هائج من المجرات والنجوم والكواكب.